政改方案被否決，「佔領中環」發起人戴耀廷尋日就話，相信呢屆政府重啟政改嘅機會唔大，但明年立法會選舉就會係重啟政改嘅關鍵，話如果泛民主派喺立法會選舉可以保住三分之一嘅議席，就可以反映市民支持泛民爭取普選嘅做法，咁就有機會令中央考慮「八三一」框架下嘅變化空間喎。泛民正正就係因為政改方案建基於「八三一」決定之下，先至堅決否決政改方案，莫非戴耀廷認為泛民明年會忽然打倒昨日的我，支持「八三一」決定之下嘅政改方案？究竟佢瞓醒未呢？
