政情：前港姐Kimmy 從政也是「鳳凰」
近年香港開始出現娛樂圈中人從政現象，唔少仲係港姐出身嘅靚女，好似人民力量袁彌明、有「哈佛小甜甜」稱號嘅任葆琳等，最近我哋又發現多一名靚女從政，就係前綫社區主任葉逸怡（Kimmy）。Kimmy曾經喺○三年參選過港姐，莫非靚女從政真係着數啲？
密密落區宣傳
Kimmy最近活躍於黃大仙嘅鳳凰選區，該區嘅現任區議員係陳炎光。睇番Kimmy上載到社交網站嘅相片，唔少都同地區工作有關，似乎密密落區做宣傳。我哋問過Kimmy會否考慮出選，佢就話區議會選舉係好遠嘅事，目前只係想簡簡單單做地區服務喎。至於點解唔選擇娛樂圈發展而要跳入政圈，佢就話私人事唔想講太多，關於地區事務嘅嘢就問番辦事處好啲喎，睇嚟佢都係想保持低調。