政情：偷步擴大控煙肇禍

立法會衞生事務委員會曾於五月中開會討論過有關加強禁煙嘅建議，陳肇始就諗住用「先訂立、後審議」嘅方式處理，計劃開完會冇幾耐就刊憲，點知原來係無諮詢過業界嘅。煙草業界收到風後，搵咗代表業界嘅批發及零售界議員方剛出頭，喺會議上鬧爆當局，但政府竟然話已經諮詢咗區議會，認真騎呢。

被批視立會橡皮圖章

方剛批評，擴大隧道出入口巴士轉乘站禁煙範圍梗係問區議會啦，但呢樣又唔係即刻實施，反而最影響業界嘅更改煙包嘅健康忠告，當局就反而急住做。佢話，須知道改包裝印刷要喺外地做，唔係話做就做到，亦應該畀業界清舊貨先，煙草商都係合法商人吖，依家當食煙嘅人係犯法咁，加上無諮詢就想刊憲，簡直當立法會係橡皮圖章！

開公聽會 「祝你好運」

就連委員會主席、衞生服務界李國麟都話，政府係有權以「先訂立、後審議」嘅方式改例，但係都應該諮詢業界，業界無意見先至實施。佢話，禁煙對健康係重要，但唔係大晒囉，如果控煙大晒，咪禁咗佢囉，睇吓出街會唔會被人打？佢又話，政治任命官員正正應該做政治工作，估唔到竟然唔理業界嘅意見。

未知政府係咪都自知理虧，李國麟透露，食衞局官員會後同佢講，呢件事未正式刊憲嘅，佢決定七月六日召開公聽會，仲向陳肇始送上「祝你好運」，似乎來勢洶洶，官員諗定點解畫都得嘞。