中環出更：辭職公投 AV仁隨時走數
「AV仁」民主黨（白鴿黨）立法會議員何俊仁，今年一月揚言喺立法會否決政改方案之後辭職發動變相公投，迫使政府重啟政改，該建議引起爭議，之後仲連較激進嘅學生組織「雙學」學民思潮及學聯都唔撐，AV仁只好喺上月決定「暫緩公投」至否決方案後再決定。政改方案已被否決，據悉白鴿黨內部對公投嘅熱情已經淡化，亦冇人再提起搞公投一事，意味AV仁辭職公投隨時走數。
白鴿黨內熱情「淡咗」
早前泛民、「雙學」、佔中三子以及多個民間團體就辭職公投成立嘅工作小組，將會喺下周四開會商討究竟仲搞唔搞辭職變相公投。其實AV仁一月拋出要喺否決政改方案後搞辭職變相公投嘅建議後，唔少人都摸不着頭腦，白鴿黨內更有溫和派明言反對。連AV仁黨友、立法會議員單仲偕尋日都話，黨內對於辭職變相公投已經「淡咗」，所以都要開會傾吓，聽吓雙學、佔中三子等有咩睇法再決定。
另外，政改方案否決之後，泛民應該何去何從，大家都未有計劃，但嚟緊十一月就係區議會選舉，所以泛民都要好好部署再上路。泛民就計劃喺七月底搞個退修營，商討區議會及明年立法會選舉、選委會選舉及一七年特首選舉部署，以及點樣重啟政改。