中環出更：名廚分享老港滋味獲獎
由香港飲食界資深前輩合作催生嘅香港美食歷史書《老港滋味》，最近勇奪一項被譽為美食圖書界奧斯卡獎嘅世界冠軍，為港爭光。尋日一班飲食界老行尊舉行祝捷會，特別開心。講開落廚趣事，到場湊熱鬧嘅中菜名廚周中就自爆，試過喺屋企煮嘢搞到廚房亂晒龍，大廚又唔習慣洗嘢，結果被太太下禁足令，唔准佢再入廚房喎。
大家都知道喺廚房打工好辛苦，周中話，四十多年前佢一入行就唔想返工，因為師傅好惡，工作又辛苦，但係媽咪鼓勵佢，結果一做就幾十年，依家仲上埋電視節目添。
「火燒重要位」 描述辛酸史
曾喺電影客串廚師嘅中菜名廚戴龍就話，當年有三句順口溜描述廚師嘅辛酸史，「頭頂攞命罩」用來形容成日被抽油煙機罩住，「腳踏棺材板」反映廚房地板總係濕淋淋，要用木板墊高嚟做嘢，仲有「火燒重要位」描述男士重要部位受爐火嘅「煎熬」，真係好陰功。
不過，香港精神就係要捱，香港飲食界先有今日嘅地位，亦先至會有呢本美食歷史書誕生，呢本書當然唔少得歷史專家鄭寶鴻嘅參與啦。
呢本書榮獲「世界美食家圖書獎」其中「最佳廚藝歷史圖書大獎」嘅世界冠軍，有份大力支持嘅飲食界名人胡珠梗係勁開心啦，同場嘅前立法會議員陳榮燦都話，呢個獎項係香港之光。
卓妮