香港之所以叫香港，其中一個講法係咁嘅。相傳好耐以前有隻紅香爐漂到銅鑼灣天后廟前，大家認為係天后顯靈，於是將香爐供奉廟內，而廟宇所在嘅山就被稱為紅香爐山，後來叫叫吓就變成香港嘞。可惜吖，社會近年愈來愈政治化，香港已經由福地變為亂地。所以話啫，禍福無門，惟人自招，自己唔爭氣，有神明照住都冇用！
唔使講第樣，淨係一個政改問題已經搞到家嘈屋閉，家陣政改被否決，爭拗告一段落，社會應該重回正軌，休養生息，港府亦話今後會集中精力處理民生問題。之不過咁，樹欲靜而風不止，反對派點會咁易收手吖。嗱，港府下星期向立法會財委會申請創科局相關撥款，反對派政客一早揚言將會拉布，當局想闖關，睇怕冇咁易，隨時又係搞到滿城風雨咋。
冇計喇，天要下雨，娘要嫁人，有啲人係都要搞搞震，係都要阻住地球轉，弱勢政府除咗被動捱打，仲有乜嘢辦法吖。好似機場第三條跑道咁，日前再有兩宗入稟法院申請司法覆核個案，係至今第四宗申請。大家應該記得當年港珠澳大橋，喺政客操弄之下受到司法覆核狙擊，埋下今日嚴重延誤同超支嘅禍根。三跑會唔會重蹈覆轍，真係冇人敢寫包單。
講真，基建延誤同超支都叫有做嘢，最怕係出師未捷身先死咋。港府計劃將洪水橋新發展區打造成新界西北嘅「區域經濟及文娛樞紐」，話可提供六萬個住宅單位以及十五萬個就業職位，聽落幾吸引，做唔做到就好難講嘞。新界東北發展計劃有辦你睇，明明係民生議題，結果因爭拗多多而寸步難行。政客為反對而反對，香港有乜法子唔原地踏步吖。
原地踏步事小，社會愈來愈分裂，搞事者愈來愈暴力先至大鑊。特別係近年不斷蔓延嘅港獨思潮，仲恐怖過新沙士，家陣甚至發展到私製炸彈，問你怕未。有人形容激進分子已經同伊斯蘭國冇乜分別，真係冇誇張。
有啲人開口埋口冇民主就冇民生，其實呢啲謊話連三歲細路都呃唔到。港英時代香港夠冇民主喇，咪又係風調雨順，政通人和；台灣家陣夠有民主喇，咪又係施政空轉，民生凋敝。咪話功夫茶唔提醒，香港一味內耗內鬥，盞玩死自己嘅咋，近年中央大力扶持上海、深圳等城市，香港嘅優勢不斷喪失，遲啲睇怕連二流城市都保唔住吖。
始終都係古人講得啱，君子之澤，五世而斬。想當年意大利威尼斯何嘗唔係全球航運同貿易中心，依家咪一樣淪為遊船河嘅小城市。香港繼續自甘墮落，遲早變番小漁村嘅咋！