天氣酷熱，政改方案在立法會被泛民否決。事實上，在審議過程中兩大陣營雞同鴨講，各有各陳詞，論點重複又重複，根本毫無新意；反對派政客大早說「綑綁」一詞係抹黑，又恍如烈士上身，把自己投下反對一票時看成是以「強臂挽危局」，形容是「根據自己意志和受良知指引」，阿哥，真係咁神聖及偉大？
政客反口覆舌，一時自抬身價，一時又話自己對得住歷史；然而，佢哋所做嘅一切，幾時有真正為香港未來嘅更好出過力？倒是興風作浪就見得多，崇洋媚外，立場千變萬化，在明眼人的心目中，已完全沒有公信力！
有論者講得好，一眾泛民議員，有些平時做慣騷嘅，更如影帝影后上身，一邊斥責政府橫蠻，中央強硬，一邊美化佢哋否決政改係對得住過去爭取民主嘅人，更對得住未來香港人！自欺欺人至此，真係上帝聽到也笑尿了！明明靠綑綁投下否決一票，還要義正詞嚴話對得住良心、對得住歷史，實情係無時無刻都拿港人的過去和未來消費一番，這不諷刺嗎？
學者就話詩人嘅話當不得真，據說這是古訓，說是唐朝有一位詩人寫詩話「舍弟江南殁，家兄塞北亡」。其友聞之，不禁哀憐甚：想不到君家不幸至此。詩人一臉得戚：我講嘅你都信？不過係作詩而已！後人嘲笑呢位仁兄，笑曰：既然你作詩，何必把兄弟全搭上，為甚麼不寫「嬌妻伴僧眠，美妾入禪房」？
泛民嘅綑綁投票是真民主？既然老早已要否決政改方案，何必一時又「難過」，一時又「憤怒」，上心成咁，真係辛苦晒，上天也要為之感動而哭泣，天氣如此翳焗，及時灑下甘霖，少開點冷氣，市民說不定可以如環境局局長黃錦星般每月只交二百多元電費，羽化而登仙，何似在人間。政改方案被否決，竟有意外之喜也。