政情：公民講場：建制蝦碌慘遭抽水

政改被否決屬意料中事，但係反對票多過贊成票，就真係令人跌晒眼鏡。尋日呢個荒腔走板嘅鬧劇，緣於立法會議員林健鋒一句「等埋發叔」，於是號召建制派議員玩離場，目的係令會議廳法定人數不足，以拖延時間等發叔。負責協調建制派撳掣嘅葉國謙收到風後，即帶頭起身行出會議廳，但係事發突然，龍尾唔知龍頭搞邊科，幾位建制派決定坐定定，結果唔小心幫泛民製造足夠法定人數嘅黃金機會，促成呢個世界級鬧劇，喺歷史上留下反對政改多過贊成嘅紀錄。難怪泛民飯盒會召集人梁家傑好似執到寶咁，狂抽建制派水。