政情：「欣」賞自貿商機謀北上搵銀
內地大幅減關稅，又開放愈嚟愈多嘅自由貿易區，內地遊客唔使再嚟香港大舉入貨，本港一眾零售商好頭痛。做名錶及高檔服裝生意嘅百利建集團董事總經理陳正欣（Daniel）一於化被動為主動，準備到深圳嘅自由貿易城設立據點。
擴展高消費服裝生意
Daniel話，香港市道低迷，暫時睇唔到曙光，除咗因為早前「驅蝗行動」趕客、多國貨幣貶值令香港嘅價格競爭力下跌外，主因同內地密鑼緊鼓推出多個自貿區不無關係。Daniel話，自貿區內利用簡易進口及清關程序，商家入口貨品暫毋須交稅，消費者每買一件就清關報稅一件，稅率大約百分之十，比起以正常渠道入口貨品所繳交嘅稅項便宜至少一半。
佢話，呢種類似直銷嘅模式，令商家資金周轉壓力大減，消費者亦慳番唔少，可謂雙贏。所以佢正積極籌備到內地自貿區設立銷售點，擴展中檔到高消費嘅服裝生意，好過喺香港坐困愁城。