尋日中午約十二點半，立法會陰錯陽差提早表決政改方案，比外界預計時間快咗大半日，全城愕然。不過勞工及福利局局長張建宗（小肥張）尋日下午三點出席一個活動時，就叻唔切自爆，自己預咗可以如期出席活動喎，講到佢好似未卜先知咁。
小肥張出席香港無名英雄嘅頒獎禮作主禮嘉賓，佢喺致詞時話，原本呢個時候佢可能仲留喺立法會，等議員就政改質詢及表決。不過佢一早就應承出席活動，同事好擔心佢可能出席唔到，好緊張。不過，小肥張就認為佢實可以出席，結果證明佢嘅諗法係啱嘅喎！如果小肥張估嘢咁叻，咁佢應該估到政改會被否決，唔該佢就勸吓政府再擇過吉日啦！