政情：政改大戰泛民四子銷聲立會
立法會尋日歷史性否決政改方案，投票之前每名議員都有十五分鐘可以陳述己見，一向不放過任何曝光機會嘅泛民主派議員，自然把握機會發言，但係最終都有四個人冇講嘢，佢哋就係超級區議會界別嘅民主黨（白鴿黨）涂謹申（阿涂）、民協馮檢基（阿基）、公民黨陳家洛同人民力量陳偉業（大舊）。究竟佢哋搞邊科？
阿涂係白鴿黨六個議員中唯一冇發言嘅，佢嘅黨友單仲偕爆料話，阿涂一早已經預備好發言稿，準備駁斥港澳辦主任王光亞。不過人有三急，阿涂去咗一趟廁所，結果返到議事廳時，政務司司長林鄭月娥已經開始發言，然後好快就付諸表決。因為去廁所而無得發言，真係奇聞。
大舊戴頭盔 預告唔發言
不過阿涂就有另一番講法，佢話心知白鴿黨樹敵眾多，同黨友協調好要「守尾門」，以便反駁建制派抹黑民主黨言論。但係預計唔到建制會出咩招數，所以都打定輸數，預咗好大機會無得講。反正白鴿黨已有五個議員發言，足夠表達該黨意見喎！但係單仲偕話佢去咗廁所喎，阿涂就話自己就算去廁所都開住直播，一直監察開會情況，唔會趕唔切。
阿基同大舊都聲稱要「守尾門」，所以無發言。其實大舊一早已經戴定頭盔，早喺前日已經同支持者道歉，話自己有好大機會唔可以發言。至於點解唔提出「中止待續」拖延投票，佢話都想盡快投票，避免夜長夢多。
阿基受訪多 上鏡當講咗
阿基就解釋，想同建制派好似「打乒乓」咁，等大部分建制發咗言先講，仲話雖然唔可以喺議事廳發言，但呢幾日接受咗多個傳媒訪問，都叫做表達咗意見。上鏡當講咗，咁立法會仲要唔要再開會呢？
議員咁多騎呢藉口，只有陳家洛最老實。佢解釋自己因為氣管敏感，出唔到聲，迫於無奈要放棄發言機會。