中環出更：泛民知驚 求創科局咪打尖
港府下周五會就開設創新及科技局嘅撥款申請再度向立法會財委會闖關，同時要求財委會當日加開一節會議，令會議延長至六小時。早有傳政府今次計劃重施故技，安排創科局撥款「打尖」排喺公務員加薪、綜援「出三糧」等六項民生項目之前，藉綑綁創科局同民生議題，慎防泛民再拉布「攬炒」民生項目。
卿姐：唔傾向拉布
不過，有部分泛民眼見區議會選舉臨近已知衰，要求政府打消打尖念頭，以免泛民一鑊熟。
民主黨劉慧卿話，反對加開會議亦唔傾向拉布，希望政改否決後有新開始，爭議性較低嘅民生議題應提前處理。
泛民飯盒會召集人梁家傑亦都話，唔少市民等住出三糧，批評政府將市民變成人質，勒索財委會，泛民一定反對加開會議。
泛民咁大反彈，皆因若為咗阻撓創科局申請撥款而拉布，對年底區議會選舉肯定百害而無一利。
另一方面，政府宣布委任科技園首席企業發展總監楊德斌為政府資訊科技總監，下月二日履新。
卓妮