中環出更：名人性在多溝通
社交網站最近興起成立「Sex Secret」專頁，成立嘅名義由各大專院校到立法會都有，目的係畀人匿名爆所屬院校或機構嘅性秘密，但查實入邊好多內容已經變晒質，隨時教壞人。尋日和富青少網絡（下稱網絡）舉行校長午餐會，本身係小學校長嘅網絡執行委員會召集人陳美娟（Sylvia）話，時代唔同咗，老師應該改變保守嘅教學方式，令學生敢於溝通，咁青少年先至可以獲得更正確嘅訊息。
講到現時學生從課堂吸收性知識時，經常尷尷尬尬唔敢問，Sylvia話，老師如果能多和學生溝通，令學生感覺可靠，咁學生就會更放心提問。至於網上嘅討論唔使負責，真假難分，青少年切勿輕信。
局長等表決 大嘥鬼頂更
尋日原本應承到場分享環保心得嘅環境局局長黃錦星，因為喺立法會等政改表決而未能出席，結果由「大嘥鬼」頂更，到場嘅仲有創辦網絡嘅和富社會企業主席李宗德及女兒李美辰（Christina）、教育局首席助理秘書長容寶樹及網絡顧問委員會主席何鏡煒。講開性教育問題，Christina話，佢嘅大仔今年讀小五，已開始踏入青春期，所以佢一早已經同丈夫溝通過，由老公負責多啲同個仔溝通，解答囝囝嘅疑惑。
咁啱尋日卓妮喺立法會見到議員蔣麗芸（Ann），於是問佢知唔知有人幫立法會開咗個名為「立會Sex Secrets」嘅專頁，阿Ann笑笑口話未聽過，仲問立法會有咩性秘密？咪以為專頁上有人爆議員嘅桃色秘密，其實都係唔相關嘅內容。阿Ann仲講笑咁話，開會悶悶地時，要上去睇吓喎！
卓妮