今時今日嘅香港，競爭力好似逆水行舟咁不進則退，反而生活成本就節節上升，衣食住行樣樣難，港人固然叫苦連天，連喺香港工作嘅外國人亦大嘆「居不易」，講起真係無奈。
唔係誇張，人力資源諮詢公司美世公布嘅二○一五年生活成本指數顯示，香港成為全球生活成本第二高嘅城市，較舊年上升一位。呢項調查涵蓋全球逾二百個城市，根據房屋、食物、交通及娛樂等消費價格，定出生活成本指數榜，排名愈前，反映海外工作人員嘅生活成本愈高，香港排名僅次於非洲國家安哥拉嘅首都羅安達，生活成本究竟有幾高，大家心照喇。
以一條牛仔褲為例，香港售價係一百二十九美元，英國倫敦係一百一十五美元，美國紐約更只需五十八美元；如果租住兩張床嘅服務式住宅，香港平均月租係六千五百七十六美元，比排第四位嘅新加坡貴咗一倍有多。近年香港樣樣落後於新加坡，唯獨生活成本遙遙領先，問你服未。
曾幾何時，香港號稱購物天堂，以價廉物美聞名於世，可惜時移勢易，今日已經冇價廉物美呢支歌仔唱咯。唔怪得連一向出手豪爽嘅內地旅客都唔肯消費，香港物價愈來愈貴，尤其奢侈品更加貴絕全球，係人都怕怕喇。
點解會搞成咁？原因可能好多，除咗港幣與美元掛鈎，匯率上升推高物價之外，「三高」問題亦係罪魁禍首。喺高地價、高樓價、高租金之下，營商成本不斷上升，物價水漲船高，生活指數有乜法子唔節節上升吖。最慘係基層市民，收入永遠追唔上通脹，生活質素每況愈下，無殼蝸牛嘅處境更加淒涼，想搵個安樂窩簡直仲難過登天。年前本地有項調查顯示，港人生活質素比○三年沙士時更不如，其中負擔物業能力指數及實質租金指數都創下十幾年新低，呢啲咪就係所有問題嘅根源囉。
所以話，唔解開地產獨大嘅死結，講乜都係假。冇錯，港府話就話將房屋問題作為施政重中之重，仲不斷出招壓抑樓價添，可惜志大才疏，搞來搞去得個吉，加上反對派阻頭阻勢，就算當局想覓地建屋都寸步難行喇。仲有吖，最近成個社會嘅焦點都放喺政改，政治狂熱蓋過一切，日日嘈喧巴閉，經濟民生根本冇人理，再咁落去，香港想唔死都幾難。有人話有民主至有民生喎，你信唔信？信佢一成，雙目失明吖！
始終都係呢句，只有安居，至可以樂業，如果港人連棲身之所都成為奢望，生活質素不斷下降，社會又點可能安定吖。