政情：帳爆添美道 建制車輪戰 逼政府清場

大輝14問 幾時清理未獲覆

民建聯陳克勤同工業界林大輝，先後喺六月初向保安局局長黎棟國提出書面質詢，指佔領行動結束以來，仍然有唔少人喺添美道一帶搭建帳篷、木屋，並擺放咗大量雜物，不單構成治安同環境衞生問題，亦有違法之嫌。其中林大輝嘅書面質詢仲列舉咗十四條問題，仔細如留守人士每日製造咗幾多垃圾同噪音水平、問責官員有冇到現場了解情況，甚至會否窒礙旅遊業發展都問埋。

雖然建制派議員持之以恒咁問，希望向政府施加壓力，奈何當局嘅回覆嚟嚟去去都差唔多，不外乎係尊重市民以合法方式表達意見，同時呼籲留守人士唔好非法霸佔公眾地方，但由始至終都冇答過幾時先會清理。

Paul引「霸道」事例問發展局

獨立議員謝偉俊（Paul）尋日亦以書面質詢問政府幾時執法，唔知係咪見保安局嘅答覆已經冇咩新意，Paul轉問發展局局長陳茂波，希望尋求一啲明確答覆。

Paul喺書面質詢提到，當局曾於二○一二年驅趕深水埗區行人路上嘅露宿人士，並移走佢哋嘅財物，但就遲遲唔清理添美道上嘅帳篷同單位。佢要求當局解釋點解對兩宗佔用行人路有唔同執法方式，同埋有否評估過對搭建物置之不理所造成嘅法律及行政後果，試圖從法律角度出發。

不過，政府嘅答覆都係換湯唔換藥，話唔適宜直接比較唔同時間、性質同社區嘅問題，各部門會密切注意路段情況，檢視所需嘅跟進措施，並會喺適當時候採取適當執法行動。睇嚟建制派要繼續研究吓，類似問題仲可以拋畀乜嘢部門，先可日以繼夜、夜以繼日咁跟進上述問題，唔知佢哋嘅決心會唔會受到打擊呢？