中環出更：金句太多 樹根病入膏「盲」
立法會議員鍾樹根嘅「鍾式」金句幾乎多到可以出本「鍾語錄」，無論四字成語「雞毛鴨蒜」、「子烏虛有」，抑或成為朱古力品牌廣告口號嘅「Same on you（Shame on you）」，樹根都話唔介意。佢解畫話，當年讀書鍾意調轉啲成語嚟講，點知細個玩慣咗，搞到依家改唔到口，成日開口講錯成語，中英文都病入膏「盲」，無得救喇！
細個調轉讀 大個改唔到
樹根話，細個讀書成日將「以訛傳訛」刻意讀成以「靴」傳「靴」，「病入膏肓」就讀成病入膏「盲」，連《岳飛之少年時代》將「岳飛，字鵬舉，相州湯陰人也。生時，有大鵬若鵠」都要改成「岳飛治蠄蟝，雙州陰陽人也。生時，有大蛇入屋」，認真反斗。
其實鍾太本身教中文，佢個女又教英文，點解唔搵屋企兩位女士惡補吓語文？樹根笑言太太已經放棄佢，話教佢唔到，無得救。開講有話「少壯不努力，老大變『樹根』」，樹根應該好認同喇！
卓妮