大事做唔到，小事做唔好，呢個就係港府嘅特性嘞。好簡單，港產官僚連搞單車徑都爛尾收場，問你服未。
係咁嘅，香港單車徑似足斷橛禾蟲，東一截，西一截，一直備受詬病，港府為咗補鑊，○八年宣布耗資二十二億元興建超級單車徑，話要將新界區多條單車徑串連起來，打造一個貫通新界東西、全長一百一十二公里嘅超級單車徑網絡喎。可惜吖，港府講就天下無敵，做就有心無力，超級單車徑去年被審計署踢爆多個路段工程嚴重延誤，最新消息更指單車徑主幹線最後一段嘅屯門至荃灣路段由於技術及造價問題而擱置；另外六條分支單車徑亦有五條因遭地區強烈反對而興建無期，即係話，成個項目接近全軍覆沒，單車網絡「經脈盡斷」，超級變成低級。
你話港產官僚幾咁窩囊吖，只不過係搞單車徑啫，又唔係搞世紀工程，咁都爛尾收場，仲點寄望佢哋搞好經濟民生吖。當然喇，超級單車徑虎頭蛇尾，一啲都唔令人奇怪，係人都知港府嘅施政特色係議而不決，決而不行，特別係基建工程，拖拖拉拉，蹉跎歲月，幾乎無一不延誤，無一不超支，單車徑屯荃路段因為技術及造價問題擱置，咪就係官僚無能嘅縮影囉。至於五條分支單車徑受到地區阻撓，就更加體現港府跛腳鴨嘅本色，發展新界東北係咁，覓地建屋係咁，連興建單車徑都係咁，呢個政府仲有幾多能耐，畫公仔唔使畫出腸喇。
講開又講，單車徑天殘地缺，失敗嘅何止係超級單車徑吖。正如單車團體批評，政府部門敷衍塞責，唔少單車徑設計失誤，保養參差，路面唔係凹凸不平，就係危機四伏，簡直攞命。唔係講笑o架，近年單車傷亡意外不斷飆升，去年高達二千四百多宗，傷亡人數已經超越電單車，唔通港產官僚咁都可以無動於衷？咪話功夫茶唔提醒，家陣民怨載道，成個社會已經好似一個炸藥庫咁，如果港府繼續胡混度日，搞到市民連安全踩單車嘅卑微願望都唔能夠滿足，民怨遲早爆煲嘅咋。
香港近年唔知行咗乜嘢衰運，諸事不順，路路不通，做乜都波折重重，爛尾收場，點可能唔沉淪吖。一葉知秋，超級單車徑有頭無尾，唔止係港府無能嘅證明，更加係香港淪落嘅標誌。嗱，政改大戰在即，如果最終一拍兩散，社會勢必更加撕裂，政局勢必更加動盪，經濟民生勢必更加不堪，到時可能只有死路一條嘅咋！