有女士話靚仔唔可靠，只係喺唔少男士眼中，太過靚嘅女人同樣有信任危機。不過對內地人氣索模文若熙嚟講，雖然佢外形冶艷兼且身材火辣，性感形象之下卻擁有內斂嘅性格，尤其對於愛情更希望畀到對方安全感，因此佢未來嘅男友大可以放心。
呢位暱稱美熙MiuMiu同美妮MuMu嘅滿族索女，用性感、火辣、迷人等嘅形容詞嚟形容佢絕對唔夠。事關佢不但擁有前凸後趷火辣身材，迷人電眼加上攝人魅力，輕易令人留下深刻印象。不過，縱然佢擁有如此優秀嘅天賦條件，亦要識得利用至得，故此聰明嘅佢甫投身模特兒行列，便以超性感嘅形象示人，憑住呢種相當吸睛嘅表現方式，令佢火速喺寫真界爆紅，不但先後為多本時尚、汽車及男士雜誌上亮相，而喺網絡上更係人氣十足，單從佢嘅微博有多達13萬追隨者足證非虛。除咗喺模特兒界揚名外，佢更先後參加過多個選美比賽並屢獲殊榮，當中分別喺2012年第39屆世界旅遊小姐中國總決賽中獲得最佳表演獎、世界休閒小姐中國區總決賽獲得完美身材獎等等。
正當大家嘅焦點落喺佢嘅性感形象之際，佢同時又向廣告同電視界發展，並且參演過多套影視作品。可能有人覺得作為一位索模，喺呢啲作品中不過係做花瓶，如果咁諗嘅話就真係大錯特錯。皆因佢其實畢業於著名嘅上海藝術學院，講到演戲真係難佢唔倒，加上亮麗及鮮明嘅形象，難怪佢如此積極向屏幕發展。不過據佢講，除咗大家誤以為佢唔識做戲外，另一個令佢覺得相當委屈嘅地方，就係以為佢係個鍾意玩嘅女人。佢自稱性格其實相當內斂，閒時不但唔鍾意去玩，就連男性朋友亦唔多，最愛就係喺屋企睇書同煲戲，可以話係半個宅女。此外，對於感情佢更係相當認真，若然第日遇到真命天子，一定會留喺屋企等對方返嚟，話咁樣可以畀到對方充分安全感，唔使擔心佢會搞搞震。
想知文若熙嘅外形係咪超越火辣咁厲害，不妨去佢個擁有超高人氣嘅微博，除咗可以睇到佢上載嘅火辣靚相外，仲可知道佢嘅近況，從而深入認識呢位人氣女神嘅誘人魅力。
網址：weibo.com/u/2112048102
出生地：江蘇
身高：168cm
三圍：34、23、35
撰文：魂