政情：醫護中心開業 發叔休息無到
香港護士管理局前主席汪國成最近有新搞作，佢同幾位醫護界人士組隊提供外展醫護配對服務，不但為長期病患者提供度身訂造嘅醫療服務，亦為已退休或未能全職工作嘅醫護人員提供就業機會。尋日呢項新業務舉行開業禮，剛卸任嘅新界鄉議局主席劉皇發（發叔）亦獲邀出席，但發叔又再神秘甩底，唔知發生咩事呢？
汪國成：劉身體唔差
我哋問過發叔身邊嘅人，都話發叔身體冇事，只係想休息吓，今日會現身喎！汪國成都話，發叔身體唔差，冇需要使用外展醫護服務，仲笑言發叔個仔都係醫生，相信佢屋企人甚至鄉議局嘅鄉紳都會安排醫療隊伍照顧佢喇！
講番呢項新業務叫「無縫醫護中心」，已有一百七十幾個醫護界人士加入，唔少都係退休醫護人員。咁會唔會變相同醫院管理局搶人？汪國成笑言加入中心嘅醫護人員唔係全職工作，唔存在同醫管局競爭喎！