政情：八網難逃：葉劉率「日本團」參觀立會

建制派對外國勢力一向相當反感，更何況係招攬佢哋大舉進入立法會？不過，新民黨主席、立法會議員葉劉淑儀尋日就喺社交網站自爆，日前率領四十幾個日本先生、太太參觀立法會大樓，團友既有日本知名企業代表，亦有從事翻譯、教日語嘅居港日本太太。葉太仲話《基本法》賦予非中國籍永久居民選舉投票嘅權利，鼓勵佢哋登記做選民添。無他嘅，新民黨近年積極開拓中產版圖，日本人聚居嘅太古城選區亦係葉太重點拉票對象，難怪葉太唔去日本都要冧日本太太，拉得一票得一票喇！