中環出更：金句：創意不限創業
香港菁英會日前舉行周年大會兼選出新一屆嘅執委，常務副主席盧金榮（Wingco）將接棒做新一屆主席，副主席莊家彬就升任常務副主席，新班子將於七月一日上任。Wingco話，上任後將投放更多時間落青年工作，鼓勵年輕人敢於創新。現時好多年輕人成日想創業，佢認為，香港嘅年輕人有創意，但唔係個個都適合創業咁話。
Wingco話，港青有創意，無論係做管理或行政工作，若能提供創新嘅做法及意念，好大機會為行業帶來新發展。講到創意，「港版膠鴨之父」林亮孫仔兼菁英會副主席林凱章（Victor）梗係好認同。
林凱章爆料黃鴨駐荔園
Victor爆料話，大家熟悉嘅黃色膠鴨仔將喺中環海濱嘅荔園亮相，到時將以類似「擲香口膠」嘅形式出現，齊齊同港人搵番童年回憶。童年時經常去荔園嘅Wingco就話，最懷念海盜船及恐龍屋，遲啲會帶兩個女兒去玩個夠。
當日在場嘅仲有菁英會創會主席施榮忻、榮譽主席白富鴻及現任主席梁宏正等人，仲有躋身新一屆副主席嘅康泰旅行社董事總經理黃進達及菁英會成員周雯玲。周雯玲話，今個月底將到北韓探秘，今次行程四日三夜，已經一早做定晒功課，諗到就興奮。咁怕唔怕惹到喺南韓爆發嘅新沙士呢？佢笑笑口話，南韓人嚟香港仲多過去北韓喇，使乜驚喎！
卓妮