政情：陳晴提醒北上港青保濕
連續多年舉辦「神州搵好工」嘅香港華菁會，今年選拔咗四十六位本地優秀大學生，明天出發到北京一間銀行實習。早前舉行啟動及授旗儀式時，華菁會主席陳晴（Judy）溫馨提示一班港青，京城天氣乾燥，夜晚瞓覺記得放杯水喺床邊，半夜起身飲啖水、潤吓喉，認真窩心。
京城實習 天氣乾燥
Judy喺南方住耐咗，依家佢返北京都有些少唔慣，尤其係朝早起身時十分口乾。所以佢除咗提醒學生要放開胸懷、增廣見聞之外，最緊要注意北京天氣早晚偏涼乾燥，要帶件薄外套，同埋飲多啲水。
今年實習計劃同往屆有啲唔同，過往學生被安排分散喺不同機構實習，今年就集中喺北京商圈嘅知名金融機構，畀有志投身內地或香港金融業嘅學生親身體驗跨境金融業嘅實際操作。