政情：「妃」常女學警想入反黑組
尋日又有新一屆警察學員畢業，喺二百幾名學警之中，獲頒「銀笛」嘅女警鄔舜妃背景最吸引，自然成為傳媒關注目標。年紀輕輕嘅佢只得廿三歲，去年畢業於樹仁大學歷史系，然後就投身警隊。佢話讀歷史只為興趣，完成女警夢先最開心。
盼助青年重返正軌
鄔舜妃話，細細個就立志除暴安良，讀大學時擔任過輔警，試過喺執勤期間被人用粗言穢語對待，但自己心口掛住個「勇」字，一啲都未驚過。佢仲話，希望將來可以入反黑組，幫助誤入歧途嘅青年走出困局。
講講吓，我哋發現原來佢都好「打」得，尤其係打籃球。佢讀大學時已活躍於多個校際籃球賽事，於二○一二年至一三年間，多次代表樹仁大學同多間大專院校對壘，難怪面對傳媒毫不怯場。