政情：波哥掃杞子幫建制派明目

立法會經過馬拉松式嘅預算案審議後，好快就進入大直路審議政改決議案。但唔少議員經過連日「拉布」折磨，已經無咗半條命。立法會保險界議員陳健波（波哥）早幾日特登入貨買咗大批頂級杞子，送畀建制派議員煲水飲，話可以明目醒神，咁就唔怕投錯票喇！

當日我哋喺立法會外見到波哥身水身汗，拎住八大袋膠袋，一望竟然全部都係杞子。波哥自爆讀過兩年中醫，知道杞子煲水可以明目，又可提神，送畀建制派議員用就最啱喇！咦？咁泛民議員點算呢？唔通真係連朋友都冇得做？

話時話，杞子通街有，點解要佢親自買？波哥話街貨好多杞子望落好靚，查實有染色。根據佢多年買杞子嘅心得，港大中醫藥學院賣嘅貨最靚，包唔係染色，就算貴到百二元半斤都照掃八斤。八斤杞子咁多，唔通波哥知道今次政改有排都未投到票，所以大量入貨，準備長期作戰？