政情：AV仁厚顏追殺黃成智
民主黨（白鴿黨）前立法會議員黃成智因力撐政改「袋住先」，被黨紀律委員會建議革除黨籍，雖然中委會下個月先開會討論紀委會嘅建議，不過外界猜測佢好大可能會被踢出黨。同屬白鴿黨嘅何俊仁（AV仁）最近經常黨鞭上身，繼之前針對黃成智計劃發起一人一信聯署支持政改，話個黨冇晒紀律後，尋日再次批評黃成智喺最緊張時刻拖白鴿黨及泛民後腿，甚至配合人哋動員，影響黨嘅聲譽咁話。不過，要數影響白鴿黨聲譽嘅，又有邊個及得上佢當日喺議事廳內睇艷照呢？
黃成智自從公開呼籲撐政改「袋住先」，白鴿黨內已經有聲音話要凍結其黨籍，近日更加發展到要革除黨籍。黃成智前日開記者會大反擊，話喺紀委會聆訊時已收回倡議「袋住先」嘅聯署行動，而且黨內亦有其他人公開發表唔同意見，點解紀律行動只係針對佢一個。對於紀委會裁定佢違規成立，佢認為有窒礙自由同排除異己之嫌，傷害黨嘅團結同聲譽，並且要求中委會否決有關決定。
事隔一日，AV仁喺電視訪問中話，任何組織都一定有規則同紀律，如果唔想跟規則同紀律，何必要參加呢個組織？佢又話，喺依家呢個緊張時刻，白鴿黨同其他泛民組織好努力爭取，而黃成智就拖佢哋後腿，甚至動員配合人哋，影響整個黨嘅聲譽。不過，相信好多人至今依然記得，AV仁上年喺鬍鬚曾宣讀財政預算案期間，公然上網睇靚女三點式艷照，而且長達半小時，今次真係唔知邊個影響黨嘅聲譽多啲呢？
雙重標準玩針對
除咗AV仁，外號「李漢奸」嘅白鴿黨創黨主席李柱銘都係一擔擔．佢喺一○年五區公投期間，經常同支持公投嘅人眉來眼去，仲喺黨大會中提出支持公投，擺明同白鴿黨唱反調，但就冇人處理過呢個破壞黨團結嘅問題。另外，公民黨（公文袋）嘅湯家驊同個黨立場不一致就眾所周知，最近佢甚至另起爐灶搞智庫，公文袋嘅人亦冇話要踢佢出黨。白鴿黨今次連番狙擊黃成智，難免令人覺得玩針對囉。