中環出更：佔領地盤 工記友被照肺
深水埗白田邨一三年起分階段清拆及重建，惟受影響居民不滿房屋署採用嘅設計，令新公屋單位大縮水。工聯會（工記）白田邨地區主任林偉文為咗呢單縮水公屋，已經搞過幾次示威，最近仲將行動升級，聯同受影響居民朝七晚七喺地盤口靜坐，實行搞番場「佔領」。不過，建制派對佔領兩字好避忌，聽聞工記高層震怒，警告林偉文若再搞落去 ，隨時踢佢出黨。
唔收手隨時踢出黨
有口痕友爆料話，工記對呢場佔領行動非常不滿，有人喺無通知嘅情況下，收走林偉文用工記牌頭插喺附近嘅旗幟，諗住藉此勸佢收手。近日更出動到高層同佢「照肺」，怪責佢身為工記人竟然搞啲咁嘅嘢，如果再唔收手分分鐘踢埋佢出黨。
據聞林偉文玩到咁激，主因係民協亦開始染指件事，咁啱林偉文嘅拍檔係前民協成員、深水埗區議員甄啟榮，佢哋當然唔想將呢塊肥豬肉拱手讓畀民協。另一方面，聽聞林偉文都有意角逐該選區嘅議席，所以做啲實事畀街坊睇，又點會甘心就此罷休？
卓妮