中環出更：浙聯青委換屆暢聚惜食
早前香港浙江省同鄉會聯合會（下稱浙聯會）青委舉行換屆晚宴，一眾旅港浙江籍人士喺會所餐廳浙江軒歡聚，見證前主席麥超傑交棒畀新任主席顧偉誠（David）嘅開心時刻。年輕人相聚又點止食飯飲酒咁簡單，當晚David特登請小寶慈善基金行政總裁陳妙瑜分享旗下惜食堂嘅經驗，個個聽完都乖乖哋食多兩啖，唔敢做大嘥鬼。
當晚到場嘅仲有啱啱卸任浙聯會會長嘅「新金王」李德麟、新任會長兼耀達集團董事長詹耀良、常務副會長兼全國青聯副主席陳仲尼（Rock）等人。
仲尼憂新沙士襲港傷「股」
阿Rock話，最近因為股市狂牛，佢間金融公司忙到不得了，不過南韓新沙士疫情持續擴散，早前青衣一間醫療中心出現懷疑新沙士病例，全城一度草木皆兵，雖然結果只係虛驚一場，但阿Rock擔心新沙士一旦襲港，到時股市暴跌二千點都唔奇。
阿Rock又話，全國青聯將於七月下旬召開換屆選舉大會，佢已確定會落莊，咁邊個會補上呢？外傳有意競逐嘅包括信和置業執董黃永光、香港青聯主席霍啟剛及香港菁英會創會會長施榮忻，阿Rock話三人各有實力，呢一刻未知邊個會勝出喎！
「香港手套大王」詹氏第二代詹嘉莉（Kelly）都有到場，佢係詹耀良嘅姪女，亦係青委社會服務部負責人，未來梗要更加投入。Kelly一向熱心公益，啱啱接任「型林環保地球協會」主席，佢話現正發起玩具回收活動，希望為貧困國家兒童送暖。
卓妮