水務署成日向市民宣傳︰「食水，係地球上最珍貴嘅資源，節約用水，下一代先可以有更美好嘅生活。」弊在有口話人冇口話自己，原來水務署正正係全港最大嘅嘥水鬼，唔止對唔住呢一代，更加對唔住下一代。
立法會一項研究發現，本港小型水塘滿溢情況嚴重，○九年至一四年平均溢流量近二千萬立方米，佔總容量約三成半，其中一三年最誇張，小型水塘溢流量更加佔總容量七成一。以每日人均耗水量一百三十公升計算，足夠四十萬港人使用一年。水務署帶頭浪費食水，市民點節約都補唔番啦。
最離譜嘅係，水務署早喺○四年已經計劃進行水塘間轉運隧道工程，點知拖吓拖吓冇晒下文，話就話預計今年動工，但依家仲未向立法會申請撥款，睇怕都係得個講字咋。
話時話，水務署浪費食水，又點止任由水塘滿瀉咁簡單吖。唔少水管嚴重老化，閒閒哋每年爆二、三百次，咁多年來都唔知浪費幾多食水。早排湖北武漢掘出一段有一百零六年歷史嘅水管，奇就奇在之前一次都未爆過，反而依家香港嘅水管爆完又爆，簡直失禮。水務署近年更換及修護全港水管，滲漏率話就話由○○年超過兩成回落至現時約一成六，成績似乎唔錯，其實仍然比其他地區高一大截，澳洲悉尼水管滲漏率只有百分之八，新加坡同南韓百分之五，東京更只有百分之二，香港簡直無得比。
正所謂水為財，水務署浪費食水，同倒錢落海冇乜分別嘅咋。最諷刺嘅係，水務署呢頭浪費食水，嗰頭真金白銀買東江水，仲要年年加價嗰隻，上個月啱啱同內地簽署新協議，每年平均加幅高達百分之六。唔講大家可能唔知，水務署總開支近二十年由四十五億元增加至八十六億元，勁升超過九成，其實只要避免浪費食水，即使唔加水費都可以大幅改善財政狀況。
當然喇，浪費公帑仲係其次，浪費天然資源至係罪大惡極。係人都知，水資源問題愈來愈嚴重，對於唔少地方嚟講，乾淨食水簡直係奢侈品。聯合國最新報告甚至預測，十五年後全球水源不足將達到四成，由此而引起嘅疾病、貧窮以至暴力衝突將會無日無之。港產官僚身在福中不知福，帶頭浪費食水，你話係咪罪無可恕吖。
有人話，水務署應該改名為嘥水署，真係一啲都冇講錯。試諗吓，如果浪費幾多食水，就扣除水務官僚幾多人工，佢哋仲敢唔敢懶懶閒吖！