政情：公民講場：懶理民生泛民有口話人

立法會財務委員會（財委會）尋日火速完會，整個會議只係用咗十五分鐘表決唯一一個項目，其餘一個鐘就被泛民主派議員用晒嚟鬧政府，質疑點解唔將民生議題擺入議程，又話如果政府喺下次會議優先處理創新及科技局撥款申請，佢哋一定會「拉布」拉到底喎。建制派議員陳鑑林（橄欖）愈聽愈扯火，後來更發言怒斥泛民喺過去多個月常常無故點算法定人數，令好多民生項目撥款都通過唔到。難為泛民依家就將民生議題掛喺口邊，扮到好關心民生咁，將所有責任推畀政府，所以佢要譴責「拉布」。泛民之後就冇再反駁，莫非被人講中咗心虛？