政情：「強」勢初現 賀梁福元連任
「新界王」立法會議員劉皇發兒子劉業強（Kenneth）登上鄉議局主席寶座後，尋日首次出席鄉郊公開活動，去咗撐支持佢嘅梁福元成功連任十八鄉鄉事委員會主席，莫非係想借機會向一班鄉紳謝票？Kenneth透露，鄉議局下星期將會拉隊去立法會撐政改，暫時應該有幾十人出席。
大個仔唔使發叔陪
今次Kenneth深入十八鄉，並唔見發叔陪同傍住，只見發叔女婿余漢坤、副主席張學明及林偉強等。余漢坤話，發叔精神唔錯，而Kenneth都大個仔，都唔使發叔陪啦！Kenneth都話唔使老竇陪，班鄉親一早識晒，所以做咗主席都無唔習慣，嚟緊仲會出席廿幾場活動添。
至於梁福元致詞時話，《基本法》第四十條保障新界原居民嘅合法傳統權益，但佢哋興建小型屋宇嗰陣，就成日受到唔理性又敵意嘅攻擊同挑釁，覺得好委屈喎。