立法會下周三將審議政改方案，泛民主派政團早已揚言要包圍立法會，甚至不排除有衝擊行動。秘書處尋日就審議政改方案期間嘅保安安排諮詢泛民議員意見，仲建議立法會大樓五樓議員專用咖啡閣及地下大堂餐廳喺審議方案期間暫停營業。其實去年佔領運動期間，立法會餐廳都如常服務，秘書處使唔使咁驚青呢？
據講班泛民議員對立法會餐廳喺審議政改方案期間暫停營業有保留，話就算佢哋唔食飯，班議員助理同記者都要食飯，如果要出大樓外食飯，再返入大樓時，隨時又要加強安檢，都幾唔方便。
秘書處就話，預計下星期立法會大樓外有大型示威，屆時將會有大批市民喺大樓外聚集。
因安全考慮及過往經驗，秘書處建議減少大樓內嘅人流，包括有需要時暫停餐廳運作。不過，有立法會餐廳職員就話，佢哋喺佔領行動期間都有做生意，就算因示威者衝擊而爆玻璃都有返工咁話，睇嚟秘書處仲騰雞過啲餐廳職員喎。