政情：財經局副局 炒完車即返工
財經事務及庫務局副局長劉怡翔（James）尋日朝早就由司機接載，坐佢專屬嘅政府專車返工，點知去到壽臣山道東與深水灣道交界一個彎位時，其座駕同對面線嘅的士迎頭相撞，James嘅座駕右邊車頭撞到散晒，車頭冚爆開，零件散落一地，好彩佢同司機都無受傷。James留低司機處理事件後，就急急轉搭其他交通工具去返工喇。
財經事務及庫務局發言人證實，James當時喺涉事私家車上，佢喺事件中無受傷，協助警方登記後就如常返工。近日相繼有官員車輛出事，好似中央政策組顧問邵善波及保安局局長黎棟國座駕早前都分別撞車，但兩人都唔喺車上，但今次James就無佢哋咁好彩喇。
曾任金管局助理總裁
其實James做過金融管理局助理總裁，又做過香港按揭證券公司總裁，坐慣金融市場「過山車」，相信今次意外唔會嚇親佢嘅。