政情：黃成智反擊 轟白鴿有敗類
民主黨（白鴿黨）前立法會議員黃成智因為力撐政改「袋住先」，被黨紀律委員會（紀委會）建議革除黨籍，而黨中委會將於七月十六日處理紀委會嘅建議，成智好大機會被踢出黨。既然白鴿黨唔念三十年舊情，成智亦「我不義」，尋日開記者會發火大反擊，逐一數臭白鴿黨，除咗批評紀委會判決無證據、無邏輯、窒礙言論自由、排除異己，又大鬧洩露紀委會判決嘅中委係「敗類」、「小人」，與黨關係全面破裂。
成智話，之前喺紀委會聆訊中講過，佢已經收回倡議「袋住先」嘅聯署，作為普通黨員，應享有表達政改嘅言論空間，黨內亦有其他人公開發表唔同意見，只係對佢採取紀律行動，係唔公道、針對佢。對於紀委會裁定佢違紀成立，佢覺得不滿同失望，狠批裁決全無證據同邏輯，有窒礙自由同排除異己之嫌，傷害黨嘅團結以及聲譽，加上紀委會三人小組又曾處理佢以往嘅紀律投訴，一定會先入為主，要求中委會否決有關決定。
愈鬧愈扯火 拒主動退黨
成智又批評，白鴿黨中委披露咗原本保密嘅判決內容，黨主席劉慧卿仲暗示中委會一定會通過紀委會嘅決定，係未審先判，有違公允同唔尊重佢，白鴿黨號稱保護人權、維護法治，竟然違反保護私隱同踐踏其他人嘅行為權利，中委要反省，黨員亦要被譴責。佢愈鬧愈火，狠批黨內有敗類中委，唔守紀律洩密，居然敢做唔敢認，係真小人。
再者，成智話洩密事件查都未查，卿姐已經話好難查，想不了了之，佢會去信投訴並要求徹查事件，唔希望白鴿黨淪為包庇高層、中委相衞嘅集團，希望中委會嚴正處理事件喎。成智慨嘆，二○○八年佢重返立法會後，每月都有贊助二千元畀落選嘅李永達，咁對兄弟，估唔到個黨要趕走佢。不過，佢聲言絕不會主動退黨。
狄志遠：佢死蠢同太單純
雖然成智呢個異己被黨排除，但溫和老鴿狄志遠（Dick）就雪中送炭，不但幫成智安排記招場地，仲以朋友身份撐場。阿Dick話，成智喺今次事件上已多次遷就個黨，希望緩和件事，以免造成傷害，又話成智係死蠢同太單純，而白鴿黨咁樣對待三十年嘅同路人，係「相煎何太急」！