中環出更：鄧家彪戲院摸黑開記招
通常議員開記者會，不外乎喺立法會或所屬政團嘅辦事處召開，但工聯會立法會議員鄧家彪早幾日就喺將軍澳一間戲院搞咗個別開生面嘅記者會。佢就話，特登揀去戲院開記招，係想大家感受戲院對生活好重要，仲好多謝香港戲院商會免費借出場地添。
出戲院始能大合照
不過，戲院始終都係烏燈黑火，佢哋要摸黑開記招，搞到傳媒拍片影相都唔方便，最後班人仲要行出戲院先影到大合照，真係好做唔做。
話說工聯會於四月訪問咗二百幾個大埔及北區居民，八成受訪者認同戲院應該被視為社區設施。鄧家彪話，大埔及北區過去合共有八間戲院，但係依家就一間都冇，居民要跨區睇戲，車費同車程都加重居民負擔。佢建議政府興建新發展區時，將戲院規劃納入「文娛設施」，規定發展商新建嘅商場內一定要有戲院，又建議政府用現有社區會堂改建做戲院，喺指定時間播放電影。
鄧家彪承認，戲院始終都係商業項目，政府唔可以畀太多優惠發展商，唔係會予人覺得「官商勾結」，但利益太少，又無人肯做，所以成件事都幾難搞。
卓妮