中環出更：政改好難過肥亨照睇好港股
港股牛市帶挈股民發財，有港產陀飛輪品牌同財經界陳永陸（陸叔）合作，推出錶面刻有牛頭嘅牛市陀飛輪錶開心吓，亦趁機做善事，每賣出一隻就捐三千元畀健康快車香港基金。早前舉行發布會時，前高官兼基金副主席馬時亨（肥亨）代表接收大支票，笑稱希望牛錶長賣長有，咁基金就豬籠入水！
不過，呢波牛市即將面對一個大考驗，就係下周進行表決嘅政改方案一旦被否決，唔知港股走勢會點？肥亨一聽到政改就好心噏，聲稱政府已放風，政改通過機會係零，真係好可惜。咁佢有冇幫手游說泛民主派朋友「轉軚」？佢邊思索邊回答：「好難」，仲話到咗呢個地步，個個都盡咗力，可惜兩邊都企到咁硬。
肥亨認為，就算政改被否決，對股市都唔會有大影響，因為結果一早預咗，股市若要下跌一早就跌咗啦！佢又相信，雖然今次中央嘅硬任務失敗咗，但都會喺經濟上繼續支持香港嘅。
牛氣沖天 沈墨寧兩蟹股鬆綁
萬希泉執董沈墨寧自爆話，今次牛市令佢兩隻蟹股終於鬆綁，唔知係咪戴住隻牛錶帶旺咗運勢？不過，唔係個個都咁鍾意炒股，家族做玩具生意嘅中華總商會青委副主席林智彬就專心做生意，最近仲設計咗一隻高達陀飛輪錶，佢自稱對高達有一份情意結，因為佢屋企同日本大玩具商BANDAI已合作咗幾十年。
卓妮