有人話，世界上最廉價嘅語言就係政客嘅道歉，真係一啲都冇講錯。呢，話口未完，又有辦大家睇嘞。
話說立法會私營骨灰安置所條例草案委員會原定尋日朝早開會，審議有關條文，點知等嚟等去只有七個人出席，仲差一個至夠法定人數，結果被迫流會。多名反對派政客甩底，其中公民黨嘅梁家傑惺惺作態向市民致歉，承諾下次一定準時喎。
嗱，呢啲咪就係廉價嘅道歉囉。係人都知，立法會流會多過食飯，淨係舊年已經有七次咁多，市民早就見怪不怪，政客話會改過自新，三歲細路都唔信喇。有人計過數，舊年立法會響鐘同點算法定人數造成嘅公帑損失，超過一千六百萬元，唔係求其一句「下不為例」可以過骨。
議員開會唔到固然離譜，藉口多多更加係匪夷所思。好似工黨嘅李卓人咁吖，居然話因為要出席歐盟喺香港舉辦嘅會議，所以冇參加尋日嘅會議喎。唔係啩，佢究竟係香港立法會議員定係歐盟議員？不過又難怪嘅，受人錢財，替人消災，李卓人所屬嘅職工盟長期接受外國政治組織供養，寧願出席歐盟活動而唔願到立法會開會，有乜出奇啫。
所以話，政客不務正業，又點止流會咁簡單吖。就講梁家傑同李卓人等多名反對派政客吖，被本報揭發收取壹傳媒老闆淫賤黎秘密捐款而冇申報，立法會話就話調查，結果淪為自己人查自己人嘅鬧劇，梁家傑等人被放生，至於李卓人咯喎，睇怕都係高高舉起，輕輕放下嘅喇。有人玩黑金政治都可以全身而退，你話係咪欠市民一個交代先？
講開又講，反對派政客嘅醜行真係一匹布咁長，佢哋有破壞冇建設，唔係爆粗就係掃枱，唔係流會就係拉布，再唔係就喺議事堂上睇艷照，正經嘢完全唔理，搞到烏煙瘴氣，立法會淪為垃圾會。特別係拉布不斷，令議會空轉，施政癱瘓，亦嚴重窒礙經濟民生。以基建工程為例，上年度立法會批出嘅撥款得七十九億元咁大把，連沙士時期都比唔上，工程一再延誤，一再超支，更加打爛唔少建築工人嘅飯碗。反對派政客阻住地球轉都算嘞，否決政改方案都算嘞，仲要沾沾自喜，當正自己係民主鬥士，簡直唔知個醜字點寫。家陣冇嘢怕，最怕政改方案一拍兩散之後，佔領之亂死灰復燃，香港想唔死都幾難。
諗落都幾諷刺，反對派政客一直以民意代表自居，查實所作所為根本就係與民為敵，市民最好嘅自救方法就係用手上選票將呢班垃圾掃出議會！