政情：有相為證：波波忙到眼「爆紅」

發展局局長陳茂波尋日出席一個活動時被發現右眼充晒血，連戴住副眼鏡都可以清楚睇到佢嘅眼白紅得好嚴重，佢話上星期長時間睇文件及工作，期間都冇乜留意，喺去洗手間照鏡時先發現隻眼突然紅咗。

之後佢去睇醫生，醫生就解釋話係因為佢疲勞過度，所以令隻眼爆微絲血管，多啲休息就無乜大礙。不過，佢經常要擔心「拉布」令政府工程延誤，又要頻頻諗計應對，想好好休息睇怕都唔容易喇。