民主黨（白鴿黨）前立法會議員黃成智，因為近日力撐政改「袋住先」，因而被黨中委及紀委會公審，仲提出革除佢黨籍。該黨中委會尋晚開會討論事件，最後定於七月十六日召開中委會處理紀委會嘅建議，預料當日會係黃成智嘅審判日！黨主席劉慧卿話，會議當日會邀請黃成智出席，依家唔評論處罰係咪過重，黨內處理違紀事件有清晰制度，會集體決定。
白鴿黨中委、前主席楊森就為黃成智寫求情信，認為佢已經收返發起聯署有條件「袋住先」，就算黨聲譽受損，但亦已凍結黃成智嘅黨籍，唔使有咁嚴重處分，亦都唔想有人覺得該黨分唔同派別。有黨內溫和派人士話，黃成智曾經同溫和黨友提過，覺得自己無犯錯，唔會退黨，如果退黨，就予人覺得自己做錯，依家要睇吓班中委點決定先。
雖然黃成智等候「發落」，但佢就質疑紀委會文件及楊森嘅求情信為何外洩，佢批評個黨話好難查邊個洩密係推搪，「要查容乜易」，覺得洩密影響佢嘅利益，一定追究到底。