中環出更：陳永棋細菌感染 入院18日
幾鋒利嘅刀都有生銹嘅一日，尤其係政治人物，唔保持健康身體，幾位高權重都無用。近期係政改關鍵時刻，但全國政協常委陳永棋（棋哥）就突然靜晒無露面，直至尋日先公開現身廣東社團總會記者會。棋哥會後自爆原來早前左腳因為細菌感染，個人又發高燒，全身痛到唔郁得，成隻小腿都潰爛晒，最終要入醫院治療十八日先至康復。
糖尿病纏身 決心戒甜品
棋哥講番件事時，都感覺猶有餘悸，佢話自己一向有糖尿病，但一直自己呃自己唔肯戒口，最鍾意食甜嘢，結果上月着短褲去打高爾夫球時就出事，細菌感染到左腳一個傷口，之後成隻左腳膝頭以下都潰爛滲血，情況非常嚴重，即刻要入院治理。
雖然住咗醫院十八日，但棋哥話都算執番條命仔，如果遲啲發現，後果可以好嚴重。經過今次事件，棋哥講明下定決心戒甜品，又話除咗屋企以外唔會再着短褲，避免雙腳傷口容易被細菌感染。棋哥一家五口兩年前去意大利玩時，成家被雷劈都無事，今次佢再大步檻過，莫非就係「必有後福」？
卓妮