排污渠駁雨水渠 避風塘臭氣撲鼻
雨水污水「同流合污」，令避風塘淪排污池！有市民發現香港仔海濱長廊對出海面不時傳出如臭蛋異味，令休憩心情打折扣，經投訴後始揭發區內有排污渠接駁雨水渠。區議員直指問題持續多年，不滿環保署未就避風塘制訂水質指標，致一直未有發現問題，促早日訂立標準以助監察。
「行過一大陣坑渠臭味，好似啲壞咗嘅雞蛋咁，想嚟行吓抖吓都唔得。」李先生不時到位於香港仔海濱公園的海濱長廊散步，發現海面不時傳來陣陣臭味，令遊人卻步，「好似舊年先話做完美化工程，個海景又咁靚，但臭到冇人敢嚟，咁同倒啲公帑落海有乜分別？」
市民擔心危害健康
李又擔心異味反映海中或有大量細菌孳生，可能危害健康，「有人會喺度釣魚，依家休漁期又有漁民留喺避風塘，都唔知會唔會搞到病！」李先生要求部門正視問題，以作改善。
渠務署發言人證實，產生異味的起因估計為污水流入雨水排放系統，經香港仔海濱長廊旁排水口排出避風塘，去年底已應環保署要求協助調查區內污水渠錯駁問題，現正利用閉路電視系統以了解事件。
部門多次聯合調查
環境保護署發言人則稱，香港仔海濱長廊有雨水渠口排放上游所收集的雨水，去年九月已發現其中一個雨水渠口排出污水，遂展開調查，去年底開始與渠務署展開多次聯合行動，現時調查已覆蓋上游大部分地區，發現有兩幢唐樓污水渠誤駁雨水渠系統，有關個案已轉介屋宇署，整項調查料今年八月完成。
發言人補充，於一二年至一四年，涉事海面海水監測站錄得的大腸桿菌數目，年幾何平均值分別為每一百毫升海水一千九百八十一、一千二百一十七及一千一百二十六個，但因該處並非泳灘或次級接觸康樂活動分區，故未有訂定相關水質指標。環保觸覺總幹事譚凱邦直指涉事海域大腸桿菌含量嚴重超標，顯示水質已受污染，「大腸桿菌生存喺人同動物嘅腸入面，即係有唔少糞便排咗出海，而且個位畀鴨脷洲擋住，水流好慢，污染物都難啲沖走。」
南區區議員柴文瀚批評，現時環保署未就避風塘等水域訂立水質指標，展開調查與否全由該署自行觀察決定，以致問題拖延多年方見跟進，「臭味問題已經持續好多年，有唔少街坊同我投訴過，區議會都討論過件事，始終呢個避風塘好接近民居，環保署應該制訂一套客觀標準，大腸桿菌含量達到一定水平就要主動調查。」
記者：呂耀焜