政改爭拗持續；泛民無視民意，成日呼籲市民不要「袋住先」，其理據來來去去就係一招了──「袋住先」隨時會變「袋一世」。
其實，香港社會爭拗不斷，尤其政制改革，正如有論者指出，全世界的政制都是在各自獨特的時空環境下演變出來的，各有各的遊戲規則，並冇所謂「普世一致」，是以本港聖公會秘書長管浩鳴力撐「袋住先」，認為一人一票選特首就是真普選，又用「主人與貓」嘅關係，比喻中央同香港嘅關係；有泛民議員批評管浩鳴比喻不倫不類，又有人斥其比喻「令人反感」！老朽則認為泛民永遠只有佢講嘅才是「真知灼見」，人哋講嘅就永遠唔妥，咁嘅「民主」胸襟，不值識者一哂！
老朽愛用「水和魚」比喻中港關係，而今管浩鳴以「主人與貓」喻之，亦一新吾人耳目也。管秘書長形容好多朋友話貓會抓爛啲傢俬，不過佢屋企嘅貓就好乖，所以唔需要搵個籠困住；是以如果想內地嘅政策放寛啲，就要視乎香港嘅表現。好明顯，如果啲大學生淨係識嗌兩句口號，公然焚燒《基本法》，又或者激進憤青成日好似食錯藥咁一味狂呼要「自決自立」，以為扭計嘅孩子就有糖食，咁佢哋無疑昧於形勢，自然要搵個籠困住佢，等佢哋冇咁癲喪！
講開貓，老朽又浮想起一則軼事；話說老毛生前，一次同劉少奇、周恩來閒話，忽然談到「如何使貓吃辣椒」這個命題。劉說：有啥難？撬開其嘴、硬塞進去便是。毛說：這會被貓抓傷，犯不着！周恩來說：把辣椒拌進魚肉裏如何！毛澤東笑着說，依我的做法，是把辣椒塗在貓的屁股上，牠就非一路舐不可。主人耍貓，可以玩到佢陀陀轉，未必一定要用籠困住佢！「主人與貓」的關係有其至理，更有深層次意義，絕非「不倫不類」也。