政情：公民講場：「涂」過秘捐調查 未釋公眾疑慮

壹傳媒集團前主席黎智英（肥佬黎）被揭發向多名泛民主派立法會議員秘密捐款，包括社民連梁國雄（長毛）、工黨李卓人、民主黨涂謹申（阿涂）、公民黨梁家傑（袋巾傑）同毛孟靜（阿毛）。就捐款醜聞收到投訴嘅立法會議員個人利益監察委員會（CMI），早前已經公布會就調查長毛同李卓人，但就會放生袋巾傑同阿毛。委員會尋日進一步公布放生阿涂，但放生理由竟然唔係因為阿涂提供足夠理據，而係因為委員會委員意見分歧、無法作出決定，所以就唔再跟進，真係離奇。今次阿涂掹車邊甩難，唔使接受調查，可以話係純粹好彩，相信依然釋除唔到公眾嘅疑慮。