政情：林奮強叫選民趕走泛民
政改方案表決在即，泛民主派立法會議員好大機會否決政改方案，早前就有學者建議壓後到明年立法會選舉後才表決政改方案，等選民踢走班泛民議員後易啲通過喎！行政會議前成員林奮強都呼籲市民要用選票趕走班泛民議員，但佢唔係為政改，而係批評班泛民「拉布」拖慢政府施政，令新界東北發展計劃遙遙無期，窒礙土地及房屋供應。
林奮強尋日出席香港發展論壇對談會時話，本港過去未有把握好機會，令競爭力下降，甚至有被澳門趕過嘅情況。佢話香港現時本地生產總值只佔全中國幾個百分比，若趨勢持續，再過十幾年後，香港就會從中國嘅經濟版圖上消失，皆因十年後，中國每年經濟增長已相對於十四個香港嘅增長。
新移民一個都不能少
面對本港競爭力下降，林奮強話港人卻排擠新移民，假如情況持續，香港人口將急劇下降，認為本地新移民一個都不能少。佢又話民主制度令政府於福利方面嘅開支不斷上升，所以唔少奉行民主制度嘅國家都負債纍纍，而一人一票亦未必係最好嘅解決方法。