政情：排除異見 民主黨不民主
民主黨（白鴿黨）前立法會議員、前中委黃成智早前因為同黨唱反調，發表「袋住先」言論，仲公開收集支持「袋住先」聯署，搞到黨中委會即刻凍結佢黨籍。據聞該黨紀律委員會（紀委會）前晚決定「判死刑」，決定革除佢黨籍，如果成事就係首名前議員被革扯。記得當年涉及桃色醜聞嘅前黨員何偉途、陳家偉，都未使紀委會革除黨籍，如今黃成智只係持不同意見就落得如此下場，反映民主黨不民主，不如直接叫白鴿黨算啦！
黃成智係白鴿黨前身之一匯點嘅成員，一直都係黨內溫和派。佢喺四月就以個人名義發起聯署，呼籲若提名委員會嘅公司票轉為個人票，以及有「白票守尾門」，泛民議員應該「袋住先」支持政改方案，之後佢仲登報希望市民聯署。該黨老鴿「AV仁」何俊仁及乳鴿許智峯隨即向紀委會投訴，中委會亦大比數通過凍結黃黨籍。紀委會前晚仲決定革除佢嘅黨籍。紀委會主席麥海華話唔可以透露原因，但據知係話黃成智發起聯署，違反黨紀喎。
中委會今商討 難望推翻
白鴿黨主席劉慧卿話，紀委會已經將報告交畀中委會，今晚會開中委會討論事件，預計兩星期後先會表決，屆時六成中委、即十七人支持就會通過，又坦言中委會未試過推翻紀委會決定，即係黃成智勢必被革除黨籍。黃成智回應話：「畀少少空間我」，佢冇回應係咪會上訴。
睇番以往白鴿黨員面對嘅醜聞，好似觀塘區前議員何偉途○四年涉嫌喺東莞公幹期間，被公安以嫖妓罪名拘捕；該黨前總幹事兼九龍城區前議員陳家偉亦喺一一年被傳媒揭發於尖沙咀香檳大廈涉嫌嫖妓，事後佢聲稱只係進行「訪談」。雖然兩人決定自行退黨，但兩人醜聞爆出後，白鴿黨都唔係立即提出凍結兩人黨籍或嚴重到去紀委會決定革除佢哋黨籍，如今黃成智撐政改「袋住先」，唔涉及個人操守，罪不至踢出黨，估唔到個黨咁狠排除異見。
自從白鴿黨於一○年「轉軚」支持政改方案，結果往後兩場大選舉均被激進泛民狙擊，難免「一朝被蛇咬、十年怕草繩」，估唔到發展到今次政改方案，該黨嘅驚恐已病入膏肓。