中環出更：范國威違規 率眾立會亂闖
立法會大樓經歷多次被示威者衝擊，已先後推出多項辣招加強保安，包括限制訪客到訪指定樓層，但新民主同盟議員范國威就公然違規，利用職權方便，率領多名中大學生擅闖民建聯（民記）議員葛珮帆（EQ）六樓嘅議員辦事處，話要EQ親自接信出席政改論壇，做法認真離譜。事件除咗挑起EQ同范國威對質外，仲引申到立法會保安仍出現漏洞，繼續淪無掩雞籠。
EQ受害 黨友鬧爆
范國威踩上EQ嘅立會議辦期間，咁啱撞到民記鍾樹根同何俊賢（高佬賢），鍾樹根事後鬧爆范國威係籠裏雞，形容辦事處女職員無端端被陌生男子圍住好驚恐，擔心下周政改方案表決時，示威者會對佢哋人生安全構成威脅。高佬賢亦批評，范國威無論出於咩動機，都唔應該以不法暴力衝擊，否則下次帶汽油彈都得啦！
范國威其後承認帶中大學生去其他樓層係違規，但反駁話學生冇叫口號，亦冇「衝擊」，批評樹根及高佬賢嘅指控誇張；而EQ作為中大校董，應學生邀請係應有之義囉。
咁講法，唔知建制派日日搵市民上范國威辦事處交流吓、慰問吓又得唔得呢？再者，中大學生邀請EQ同張宇人出席論壇，又關范國威咩事呢？
卓妮