中環出更：心繫青聯 啟剛冷落囝囝
暑假係學生實習旺季，由香港青聯學生交流網絡（SEN）等團體舉辦嘅暑期實習，六月中將派出逾三百位大專精英到上海、北京及大連等地實習，一班學員未出發先興奮，尋日叫埋香港青聯主席霍啟剛等一眾核心成員，搞個揭幕禮打打氣。不過作為搞手嘅啟剛，竟然忙到忘記咗幫囝囝霍中曦安排暑期活動，反而太太郭晶晶先係最細心。
爆愛兒大膽池邊玩跳水
啟剛話，其實都係時候諗吓安排中曦上暑期班，但佢爆料話，晶晶不時都有教囝囝游水，中曦戴上吹氣手袖，已游得似模似樣，又大膽地由池邊跳落水，甚有媽咪嘅跳水天分。
北上實習機會處處，睇番香港嘅氣氛就麻麻，自從收緊一簽多行後，零售市道冷卻。經營護膚品生意嘅青聯副主席郭永亮話，零售生意跌咗三成，好無奈，幸好佢喺上海、北京及青島分店嘅生意不俗，故今年會主力拓展內地市場，受惠於內地嘅巨大發展潛力。
陳龍盛焗租貴價樓上舖
經營樓上網吧嘅青聯副秘書長陳龍盛（Eddy）都大呻業主狂加租。佢手上現時租用約廿個樓上舖，但近日業主加租百分之二十至三十五。Eddy分析，由於地舖經營日漸困難，唔少老闆被迫上樓經營，令樓上舖更吃香。雖然被迫大幅加租，但Eddy為生意，只好無奈接受。
卓妮