某講波佬名句︰十二碼一係入，一係唔入。不過世事無絕對，仲有第三種可能嘅，就係有人搬龍門，搞到原本入球都變成唔入嘞，吹脹。
功夫茶唔係無喇喇講波經o架。呢，兩名公屋申請人向申訴專員公署投訴，話房委會今年二月修訂非長者單身人士配額計分制，令佢哋輪候期不減反增。其中一名申請人輪候公屋多年，本來預計今年年尾可獲審查，以為苦日子熬到頭喇，點知新制實施後，估計要再等多六年，條氣梗係唔順喇。負責協助佢哋嘅立法會議員就批評，當局每隔幾年就更新計分制度係「搬龍門」，令非長者單身人士上樓遙遙無期咁話。
又難怪佢哋咁勞氣嘅。係人都知，家陣公屋申請個案接近三十萬，其中一半申請屬於非長者單身人士，平均輪候時間超過三年，個別要等成十年都話唔定，千辛萬苦終於輪到自己，點知煮熟嘅鴨子居然都會飛走，唔嬲就假咯。
對於佢哋嘅遭遇，功夫茶都深表同情，問題係公屋單位就係咁多，餅就係咁大，無論計分制點調整，都難免順得哥情失嫂意。呢，早排有非長者單身人士不滿輪候公屋要等成二十年，申請司法覆核要求推翻公屋計分制添。一旦勝訴，當局肯定有排煩。
都係嗰句，有頭髮冇人想做瘌痢。如果唔係私樓樓價高處未算高，超出大多數打工仔嘅負擔能力，大家就唔會對公屋趨之若鶩啦。早排一名男子因為獲分配公屋，自以為身價百倍而態度囂張，威脅唔落女朋友個名，最終搞到分手收場，咁就知公屋幾矜貴啦。曾幾何時，公屋只係基層市民嘅容身之所，估唔到今時今日幾乎變成「身份象徵」咁滯，都咪話唔諷刺！
基層上樓等到變長頸鹿，講到尾都係因為官僚冇做好自己份工。前朝曾蔭權爵士黐住富豪又食又拎，興建公屋一味歎慢板，現屆政府雖然有心撥亂反正，可惜無力回天，增加房屋供應毫無寸進。運輸及房屋局局長張炳良話喎，明白現時樓價以及租金高企，特別係年輕人更加依賴公屋，承諾加快興建公營房屋喎。講就幾好聽，係咪吹水唔抹嘴，仲要睇過至知。
政府無能固然抵鬧，政客無良一樣咁累事。大家有眼見，反對派有破壞冇建設，唔係不合作就係拉布，對政府拓土建屋計劃一味say no，想佢哋提出咩建設性意見？嘥氣啦，不如叫有啲人先騰出個單位畀有需要市民好過喇。
都係中央官員講得啱，房屋係民生問題，處理得唔好分分鐘變成政治問題，當局淨係識喺計分制搬龍門，盞激化矛盾嘅咋！