南韓的新沙士疫情迅速擴散，其來勢之兇悍，南韓已知驚矣；除了數百學校停課防疫，其副總理亦提出需將疫情級別，調升至最高級。
有道是「神清則智明」，精神若是能夠清朗澄澈，那麼智慧就會自然顯露而足以明察事物。今趟南韓爆發俗稱「新沙士」嘅中東呼吸綜合症，顯然受到世衞「神不清」而「智不明」的誤導，一開始盲從世衞嘅建議，拒絕公布受到疫情影響嘅醫院名單，以為「瞞一時」就可以「安一世」，如此阿Q精神，卒令到新沙士個案飇升，首爾及釜山等相繼有病例，顯示社區爆發風險顯著增加，種種迹象顯示，南韓嘅確診患者好快就會突破百人，而死亡人數亦會進一步增加。論者指出，根據外遊警示制度，當八十五個較多港人到訪的海外國家及地區，出現可能影響香港居民人身安全嘅事故時，保安局會評估風險，並考慮是否需發出外遊警示，當中並無規定必須顧及世衞嘅決定。
事實上，香港官僚做事，向來後知後覺，乜都慢半拍，台灣早於上星期已將首爾列作二級旅遊警示，本報「正論」早於五月三十日已指出「新沙士破門而入，衞生署把關兒戲」，警告「全球一體化的今日，各地人流物流往來頻繁，病毒沒有地域和時空之分，任何疏忽都可能為香港帶來奇災巨禍」；言猶在耳，截至昨日本報「正論」又義正辭嚴指出港府抗疫猶抱琵琶半掩面，搞出一個「類似紅色外遊警示」嘅笑話，一再告誡港府官僚「防疫寧緊勿鬆」；最終署理行政長官林鄭昨日出來「補鑊」話當局決定發出紅色旅遊警示，認為是更清晰令旅遊業界「有所適從」！
阿哥，如果衞生署同保安局大家都「神清智明」，不是錯判形勢，就唔會搞出「類似紅色外遊警示」嘅混吉訊號，搞到人心惶惶，旅遊業界怨聲載道喇！講完。