政情：八網難逃：港鐵食嘢斷正 黃之鋒認衰

做政治人物，一言一行都要好小心，學民思潮召集人黃之鋒尋日就被網民發現佢喺港鐵車廂內食包，於是即刻影低佢嘅食相，放上網寸爆佢知法犯法。呢張食相一出，網民罵聲四起，多數人都話佢寬己嚴人，身為公眾人物都唔檢點。平時鍾意死都拗返生嘅黃之鋒，今次終於認衰，立即在社交網站facebook上轉貼有關圖片，承認有喺港鐵內食嘢，佢的確有錯，亦唔會為自己嘅錯失推搪同搵借口，並向公眾道歉，承諾永無下次喎。