十二歲無證兒童懷仔同外婆周紹璇自動遣返內地深圳後，周婆婆批評工聯會立法會議員陳婉嫻（嫻姐）誤導佢哋。
自從周婆婆開聲發炮後，嫻姐一直未有現身，日前更要黨友黃國健同鄧家彪擋駕，嫻姐為咗件事唔想繼續發酵落去，尋日朝早主動回應事件，解釋話自願遣返係周婆婆嘅意願，佢同助理都無動機誤導周婆婆，一切都在陽光下進行，事件令佢感到委屈喎。
由於最初係嫻姐主動協助兩婆孫，甚至帶兩人一齊開記者會，所以當周婆婆喺深圳鬧爆嫻姐誤導時，令呢件無證兒童風波再次高潮迭起。事隔一日後，嫻姐終於現身立法會解畫，到底邊個教周婆婆自願遣返內地，嫻姐就話一向以來處理每個求助個案時，都係由對方作出所有決定，自己只係從旁協助幫忙，而周婆婆話有人半夜敲門，同懷仔都好驚，先決定自願遣返。
喺政壇打滾多年，嫻姐話只要係啱就會去做，任何求情個案都會盡力幫手，但未必每宗個案結果都能令對方滿意，希望求助嘅人要講出實情，否則好難幫到手。周婆婆喺今次事件上，被揭發大話連篇，唔知道嫻姐有冇後悔幫錯咗人呢？